教育部按算佇115年3月佮7月會辦2擺的臺灣台語認證考試，嘛已經共這2擺考試的重要日程表攏公佈佇認證考試的網站矣（https://ttg.moe.edu.tw）。115年3月的臺灣台語認證考試，報名時間對這馬開始，到11月14下晡5點，無限定身份，凡若有興趣的人，攏會當佇線頂報名。報名費250箍，若19歲以下的咱猶會特別優待免抾錢。測驗所有的項目（聽、講、讀、寫4項）若攏考有齊著的，咱猶有攢1份紀念品欲相送。

　　著特別提醒考生的是，明年A、B、C三卷考試攏齊改做「電腦化測驗」（其中書寫測驗原在用紙筆作答）。閣再，猶未讀冊的細漢囡仔（6歲以下）抑是歲頭較濟（65歲以上）的人若欲考A卷，感覺家己用電腦考試加減會有困難的，嘛通申請特殊服務，詳細說明請看刊佇考試網站頂懸的簡章內容。為著欲予考生適應用電腦考試，教育部嘛有佇認證考試網站的「自學資源」專區，設一个「電腦化測驗線頂模擬平台」，歡迎考生才較捷來試用看覓咧，予咱通冗早適應。

　　115年3月這場的考試會分三卷、做兩工辦。3月初7（拜六）先考A卷；3月初8（禮拜）才考B佮C卷。7月彼場就干焦考A、B兩卷。

　　另外，除了考試方式改用電腦測驗，考生的成績若是達到各級的通過標準，115年開始會改寄電子證書。無紙化毋但是環保，也省去寄送的時間，閣再考生嘛免驚證書會拍無抑是各樣去，予咱省事事省，嘛免驚證書會有假包，咱政府也有設「教育部電子證書驗證系統」通查證。

　　有關考試的資訊，已經有共刊佇認證考試的網站，佇「最新消息」遐就查會著。若猶有其他考試相關的問題，才請聯絡承辦單位國立臺灣師範大學。電話服務專線：(02)7749-9511；嘛有服務信箱：ttg.sce@deps.ntnu.edu.tw。
https://ttg.moe.edu.tw/tmt/news/detail.php?106